352
بسم الله الرحمن الرحيم
الحمد لله ربّ العالمين و الصلاة و السلام على خير خلقه محمـد و آله و أصحابه أجمعين
Аса мейірімді, ерекше рақымды Алланың атымен бастаймын. Барша мадақ атаулы әлемдердің Раббысы Аллаға тән. Адамзаттың асылы Мұхаммедке, оның отбасы мен барша сахабаларына салауат пен сәлем болғай!
Допинг – спортпен шұғылдану кезінде адамға жасанды түрде артық күш беретін, биологиялық белсенділікті арттыратын, денсаулыққа кері әсері бар препарат.
Шариғат дінді, жанды, ақылды, дүние-мүлікті, нәсіл-текті сақтауға бұйырады.
Спорттың басты мақсаттарының бірі денені тіктеп, денсаулыққа пайда келтіру әрі денеге келетін әр түрлі ауру-сырқаудан сақтап, қуатты-мығым дене ету.
Жалпы алғанда адам денесі табиғи қуатты, төзімді етіп жаратылған. Ал допингтің кез-келген түріне көңіл аударар болсақ, одан адам дене-мүшесіне келіп-кетер ешбір пайда жоқ. Керісінше денені қуатынан айырып, адам өміріне қауіп төндіріп, созылмалы ауруларға шалдықтырады, кейде қайғылы жағдайға душар етуі де мүмкін. Алла Тағала қасиетті Құранда:
وَلاَ تُلْقُواْ بِأَيْدِيكُمْ إِلَى التَّهْلُكَةِ
«Өз-өздеріңді қауіп-қатерге итермелемеңдер»[1] – деп бұйырған.
Шариғатта: ,
كل ما ثبت ضرره ثبت تحريمه
«Зияндылығы белгілі кез-келген нәрсенің харам екендігі анық» – деген қағида бар.
Допинг қолдану денсаулыққа зиянын тигізіп қана қоймай, адам ағзасының Алла Тағала жаратқан табиғи қалпын жояды. Допинг қолдану өтірікке, алдауға, табиғи болмысын жасыруға себеп болады.
Алла Тағала Құранда:
يَا أَيُّهَا الَّذِينَ آمَنُواْ اتَّقُواْ اللّهَ وَكُونُواْ مَعَ الصَّادِقِينَ
«Уа, иман келтіргендер! Алладан қорқыңдар және шыншылдармен бірге болыңдар»[2] – десе, Пайғамбарымыз (Оған Алланың салауаты мен сәлемі болсын):
من غشنا فليس منا
«Кім біздерді (мұсылмандарды) алдаса бізден емес»[3] – деген.
ҮКІМ: Допинг адам денсаулығына зиян болғандықтан әрі спорттық ұйымдардың талаптарына қайшы келгендіктен оны қолдануға шариғатта тыйым салынады.
[1] Бақара сүресі: 195-аят.
[2] Тәубе сүресі: 119-аят.
[3] Имам Муслим