Бұл өмірде әлдебір жетістікке жету үшін, әлдеқандай жақсылыққа кенелу үшін жанашыр дос керек.
⠀
Жүсіп Баласағұни: “Жалғыз жортқан кісі – қаңбақ көшпелі, шарапаты тимес елге, еш тегі”, – деп “жаяудың үні, жалғыздың шаңы шықпайтынын” айтып кеткен екен.
⠀
Мұса пайғамбар да Алла Тағаладан дос сұраған.
⠀
Ол: “Маған өз әулетімнен біреуді, бауырым Харунды ақылшы қылғайсың. Ол арқылы мені күшейте көр. Оны ісіме ортақ ет. Бұл Сені көбірек дәріптеуіміз, Сені көбірек еске алуымыз үшін”, – деп тілеген. (20:29-34)
⠀
Бұл аяттардан достың бойынан төмендегідей қасиеттер табылуы керек екенін байқауға болады:
⠀
1️⃣ Жанашыр. Өйткені, Мұса пайғамбар “өз әулетімнен” деп сұрады. Көбіне, жақын адамның жанашыр болатыны белгілі.
⠀
2️⃣ Ақылшы. Өйткені, аяттағы “وزير” деген сөз “ақыл-кеңес беретін адам” деген мағына береді.
⠀
3️⃣ Жәрдемші. Өйткені, “Ол арқылы мені күшейте көр” дегені – оны маған жәрдемші еткейсің дегені.
⠀
4️⃣ Қуаныш пен қайғыға ортақ болу. Өйткені, Мұса пайғамбар оны сауапты да, жауапты пайғамбарлық миссияма ортақ ет, яғни оны да пайғамбар қыл деп сұрады.
⠀
5️⃣ Жақсылыққа жетелеу. Өйткені, аятта “Бұл сені көбірек дәріптеуіміз, Сені көбірек еске алуымыз үшін” деп Мұса пайғамбар дос сұрауының себебін баяндады. Ендеше, бір-біріне жақсылық жасауға жәрдемші болу – достық борыш!