3388ҚМДБ Жастар ісі секторы, Қызылорда облысы бойынша өкілдігінің ұйымдастыруымен “ҚР ҚМ Әскери-техникалық мектебінің облыстағы филиалында” “Елеңдеп еске аламын” атты танымдық шара өтті.
Қызылорда қалалық «Мырқы қажы» мешітінің наиб имамы Асқар Жұбанов қатысушыларға «Бабалар ізімен: Қазақ даласындағы мұсылмандық мектеп» кітабын таныстырды.
«Қазақстан мұсылмандары діни басқармасының бабаларымыз ұстанған сара жолды насихаттаудағы басты мақсаты – келешек ұрпағымызға ғасырлар бойы қалыптасқан ұлттық және діни құндылықтарымызға негізделген дәстүрлі дініміздің негіздерін жеткізу болып табылады. Себебі дәстүрлі дінімізбен көкірек көзін суарған жастар жат ағымның жетегінде кете қоймасы анық.
Бұл еңбекте асыл дініміз исламның Қазақ даласына келу тарихы, халқымыздың әдет-ғұрпы мен салт-дәстүріндегі діннің алар орны мен бабалар ұстанған шариғат парыздары, иман негіздері, сондай-ақ мұсылмандық әдеп жоралғылары қамтылды. Кітап үш бөлімнен тұрады. Бірінші бөлім «Дәстүрлі діни танымның тарихи негіздері» деп аталады. Екінші бөлім дәстүрлі діни таным ұстындарына арналды. Ал үшінші бөлімде дін мен дәстүр сабақтастығы кеңінен жазылған», – деді Асқар Жұбанов
Басқосу барысында бабалар рухына Құран бағышталып, арнайы дұға жасалды.
