БАС ИМАМ АРАЛ АУДАНЫ ӘКІМДІГІНДЕ ӨТКЕН АКТИВ ОТЫРЫСЫНА ҚАТЫСТЫ

Қызылорда облысының бас имамы Дастан Құрманбаев Арал ауданы әкімдігінде өткен аудандық орталық мешітіндегі кадрлық өзгерістерге байланысты актив отырысына қатысты.

Жиынға аудан әкімінің орынбасары Нұрмұхамет Бохаев төрағалық етіп, жиынның күн тәртібіне сәйкес кадрлық өзгерістерге кезек берді.

Актив отырысында Сыр өңірінің бас имамы Дастан Жанасұлы Арал аудандық орталық мешітінің бас имамы қызметіне Мырзағазиев Ануар Махсатұлының тағайындалғанын жеткізіп, қысқаша өмір жолына тоқталып өтті.

Аудан әкімінің орынбасары Нұрмұхамет Омарұлы бүгінге дейін Арал аудандық орталық мешітінің бас имамы қызметін атқарып келген Қайырхан Табысұлына аудандағы діни тұрақтылықты сақтап, асыл дініміздің құндылықтарын дәріптеу жолындағы қызметіне алғыс білдіре отырып, аудан әкімінің алғыс хатын табыстады.

Жиын барысында ел ағалары, зиялы қауым өкілдері жаңа қызметке тағайындалып жатқан қос азаматқа ізгі лебіздерін жеткізіп, алдағы қызметтеріне сәттілік тіледі.

ҚМДБ-ның Қызылорда облысы бойынша өкілдігінің баспасөз қызметі