154
Облыс орталығында мешіт жамағаты арасында шағын футболдан жарыс өтті.
ҚМДБ-ның Қызылорда облысы бойынша өкілдігі, Жастар ісі секторы және Дін мәселелерін зерттеу орталығымен ұйымдастырылған додаға 16 команда қатысты.
Жамағат арасында тығыз қарым-қатынас орнатуға атсалысу, өзара бірліктерін арттыру, салауатты өмір салтын насихаттау, бұқаралық спортты дамыту мақсатында өткізілген жарыс тартысқа толы болды.
Аяқ доп сайысында «Айтбай» мешіті атынан ұйымдасқан команда топ жарып, бірінші орынды иеленді.
Екінші орын «Мүсірәлі ата» мешітіне бұйырды. «Хазірет Осман» және «Хазірет Әли» мешіттері үшінші орынға табан тіреді. Жеңімпаздар кубоктармен, естелік сыйлықтармен марапатталды.
Сондай-ақ, ойыншылар арасында оза шапқан Акижан Қадыралиев пен Тұрар Қуанышбековке «Үздік ойыншы», Арсен Алиев пен Мейіржан Мұратбекұлына «Үздік шабуылшы», Ерәділ Тлеуов пен Қайырбек Әбдікәрімге «Үздік қақпашы» номинациялары берілді.
