1690
Қармақшыда ҚМДБ-ның Қызылорда облысы бойынша өкілдігінің ұйымдастыруымен облыстық азаншылар байқауы өтті.
Қармақшы ауданында 15 жыл бойы азан шақырып, дін саласында қызмет атқарған марқұм Камал Нағашыбайұлының рухына бағышталған жарысқа аудан әкімінің орынбасары Самат Қыдырбекұлы, аудандық ардагерлер Кеңесінің төрағасы Асқар Ермағамбетұлы, аудандық қоғамдық Кеңес төрағасы Әбдірахман Құлдүйсенов, облыстық «Ақмешіт-Сырдария» орталық мешітінің бірінші наиб имамы Жақсыбек Әбиұлы арнайы қатысып, құттықтау сөз сөйледі.
Мешіт қызметкерлері арасында өткен сайыста қатысушыларға қойылған негізгі талаптар – азанды толық жатқа және әуезді жеткізу, мақамды дұрыс қолдану, тәжуид ережелерін сақтау, азаннан кейін оқылатын дұғаларды білу, сондай-ақ қосымша діни сауалдарға жауап бере білу болды.
Сайысқа Сыр өңірінің мешіттерінен іріктелген 15 үміткер қатысты. Байқау нәтижесінде Қарағанды қаласында өтетін VІ республикалық «Әдемі әуезді азаншы» жарысына облыс атынан қатысатын үміткер анықталды.
Әділқазылар алқасының құрамы:
• Қазылар алқасының төрағасы – Құран секторының облыс бойынша өкілі, Жаңақорған ауданы «Һисамиддин Сығанақи» мешітінің бас имамы Мұқан қари Нұрланұлы;
• Қазылар мүшесі – 2018 жылғы республикалық «Әсем әуезді азаншы» байқауының бас жүлде иегері, облыстық «Ақмешіт – Сырдария» орталық мешітінің наиб имамы Шыңғыс қари Жаппарханұлы;
• Қазылар мүшесі – облыстық оқу-ағарту жұмыстарына жауапты, орталық мешіттің наиб имамы Нұрсұлтан Уәлиұлы.
Әділқазылар шешімімен:
• І орын (100 000 теңге): Қызылорда қалалық «Құддыс ишан» мешітінің ұстазы Бекзат Жүсіпұлы үздік деп танылып, республикалық байқауға жолдама алды;
• ІІ орын (70 000 теңге): Жаңақорған кентіндегі «Әл-Мүмин» мешітінің наиб имамы Ақмұрат Әлімбайұлы;
• ІІІ орын (50 000 теңге): Арал ауданы, Қосжар ауылындағы «Ізімбет ахун» мешітінің имамы Жантуған Жөкенов ие болды.
Сондай-ақ, өзге қатысушыларға ынталандыру мақсатында 10 000 теңгеден қаржылай сыйлықтар мен естелік картиналар табыс етілді.
ҚМДБ Қызылорда облысы бойынша өкілдігінің баспасөз қызметі
